انا اخوكم صابر اولا" تحية لكل الشباب في برنامج كيتو فور اول، انا بشكركم كتير وماعارف ابدا قصتي من وين ولا اكملها كيف.. المهم انا كنت عندي مشكلة وزن وبحاول انزلوا باي اسلوب خسرت بالجد قروش كتيرة ملايين وما خليت منتج قالوا بنزل السمنة الا واخدتو يوم ١٩ / ٦ / ٢٠٢٠م ربنا اكرمني ولقيت زولة كلمتني عن الكيتو.. ومن لحظتها بقرا عنو لمن بديت يوم ٢٤/ ٦ قصة انقاص الوزن دي مهمة بالنسبة لي عشان عندي ضغط دم وضربات قلب وآلام مفاصل الصلاة في تعب ولبس الجزمة في تعب والقعاد في تعب

بعد بديت الكيتو ما اشتغلت بكلام زول عن الكيتو ولا عن اي شي تاني.. وطوالي شلت جدولي وبقيت اطبق فيهو ، بالجد لو عايز وزنك ينزل لااااازم تتبع الجدول .. بديت من ١١٤ كيلو بعد اسبوع لقيت نفسي نازل ٦ كيلو ..فرحت شديد وبقيت بمشي بكل التوجيهات البقولوها الآدمنز ..

بعدين باكل ورقيات وجرجير كمياااااات لدرجة انو ماجاني كيتوفلو خالص خالص والحمدلله لقيت نفسي كللل اسبوع بنزل ٦ كيلو .. لمن جاء الاسبوع الرابع يعني شهر انا نازل ٢٤ كيلو الحمدلله .. طبعا اتفاجأت جدا والناس لاحظت للتغير .. بالذات اني قاعد في منطقة مافيها خيارات للاكل فقط جرجير واللحوم والبيض الفي الجدول ..

انا ما ح اخلي الكيتو خالص حتى بعد اوصل للوزن المثالي، وطولي ١٧٣ سم لازم اوصل على الاقل ٧٥ كيلو وح ارسل ليكم صوري كل فترة عشان تشوفوا انجازي وتعرفوا انو الحماس والاصرار والعزيمة هو البجيب نتيجة .. و اهم شي انو انا من الاسبوع التاني لقيت انو ضغطي مستقر الحمدلله، والله مامصدق لاني كنت بستخدم اخر مقاس في حبوب الضغط، والجيوب الانفية راحت برضو ووجع المفاصل راح والشخير ماف وبقيت اخلف كراعي في الكرسي كمان ..

بشكركم كتييييير الآدمنز القائمين على كيتو فور اول لانكم كنتو سبب في الوصول لهدفي وتحسين صحتي.